ბინების გამქირავებლების 80 % არ არის რეგისტრირებული

შემოსავლების სამსახური მსგავს შემთხვევებზე ჯერჯერობით თვალს ხუჭავს

commersant.ge

ბინების გამქირავებლების 80 % არ არის რეგისტრირებული.

როგორც უძრავი ქონების სააგენტო ,,სითი კომპანის” დამფუძნებელმა თამაზ ქობალიამ commersant.ge-ს განუცხადა, დღეს საქართველოში ბინების გამქირავებლების 80 პროცენტი 20%-იან საშემოსავლო გადასახადს არ იხდის.

ახალი საგადასახადო კოდექსის თანახმად, თუ იურიდიული პირი ფიზიკური პირისგან ფართს იქირავებს, მაშინ იურიდიული პირი ვალდებულია თავად დააკავოს საშემოსავლო გადასახადი. ძველი კოდექსის თანახმად კი იურიდიული პირი კერძოს სრულად უნაზღაურებდა თანხას, საშემოსავლო გადასახადს კი ფიზიკური პირი იხდიდა.

ფიზიკურ პირებს შორის უძრავი ქონების ქირავნობის შემთხვევაში, გამქირავებელსა და დამქირავებელს შორის მოლაპარაკებით გადაწყდება, ვინ გადაიხდის 20%-იან საშემოსავლო გადასახადს. შემოსავლების სამსახურს კი მკაცრი ადმინისტრირების წარმოება მოუწევს, რათა გამოავლინოს კერძო პირებს შორის ქირაობის ფაქტები.

ქობალიას განცხადებით, მას შემდეგ, რაც საშემოსავლო სამსახური მსგავსი დარღვევების გამოვლენას დაიწყებს, თბილისში ბინის ქირის ფასი გაიზრდება. მისივე თქმით, საშემოსავლო სამსახურის თანამშრომლებისთვის გამქირავებლის გამოვლენა (მაგალითად, საგადასახადო აგენტის დახმარებით) პრობლემას არ წარმოადგენს, დაჯარიმების პრეცედენტის შექმნის შემდეგ კი ყველა გამქირავებელი დაიწყებს ზრუნვას დარეგისტრირებაზე.

,,სითი კომპანის” დამფუძნებლის თქმით, ქირის ფასი თბილისში უბნების, პირობებისა და სხვა არაერთი ფაქტორის გათვალისწინებით დგინდება. მისი ვარაუდით, 20% საშემოსავლო გადასახადის რეალურად ამოქმედების შემდეგ ბინის გაქირავების ფასი კიდევ გაიზრდება.