„ბითიეი ბანკი“ ინვესტორებს აფრთხილებს, რომ ვალების გადახდას ვეღარ შეძლებს

მოახდენს თუ არა გავლენას ყაზახური საბანკო გიგანტის „ბითიეი ბანკის“ სირთულეები „ბითიეი ბანკ საქართველოზე“? შეგახსენებთ:  ყაზახური  ბანკი ინვესტორებს აფრთხილებს, რომ ვალების გადახდას ვეღარ შეძლებს და განმეორებით რესტრუქტურიზებას დაიწყებს. ინფორმაციას ბანკის დირექტორთა საბჭოს თავმჯდომარის წერილზე დაყრდნობით „როიტერი“ ავრცელებს.

ანვარ საიდენოვის წერილის მიხედვით ირკვევა, რომ მენეჯმენტი აღარ ელოდება, რომ ბანკს ექნება ნაღდი ფულის სათანადო მაჩვენებელი პროცენტების გადასახდელად. ამასთან, ყოველი ასეთი გადასახადები კიდევ უფრო დაამძიმებს ბანკის კაპიტალის და ლიკვიდობის არსებულ მაჩვენებლებს.

თუმცა, „ბითიეი ბანკ საქართველოში“ რადიო „კომერსანტს“ განუცხადეს, რომ ამ განცხადებას მათთან არანაირი კავშირი არა აქვს. მათი განმარტებით, ეს პროცესები არანაირ გავლენას არ იქონიებს საქართველოში „ბითიეი ბანკზე“ და მის ფილიალებზე.