რომელი ბანკი იცავს მომხმარებელთა უფლებებს ყველაზე უკეთ?

რომელი ბანკი აკმაყოფილებს ყველაზე უკეთ კლიენტთა საჩივრებს? ამის შესახებ ინფორმაციას საზოგადოებას ეროვნული ბანკი მიაწვდის. როგორც დღევანდელ პრეს–კონფერენციაზე ეროვნული ბანკის პრეზიდენტმა გიორგი ქადაგიძემ განაცხადა, დღეს ამოქმედებული, საბანკო რეგულაციების ახალი ნორმების ფარგლებში, ეროვნულ ბანკში სპეციალური განყოფილება შეიქმნება, სადაც კლიენტები თავიანთ საჩივრებს წარადგენენ.

ქადაგიძის განმარტებით, ეროვნული ბანკი მკაცრ მონიტორინგს განახორციელებს იმაზე, თუ რომელ ბანკში რამდენი საჩივარი შევიდა და როგორ დააკმაყოფილა ისინი ბანკმა.

შეგახსენებთ, რომ დღეიდან ქართული ბანკებისთვის ახალი წესები შედის ძალაში. “მომხმარებლისთვის აუცილებელი ინფორმაციის მიწოდების წესი” საფინანსო სექტორს ავალდებულებს  ხელშეკრულებებში გამჭვირვალედ ასახონ ყველა ფინანსური ხარჯი, რომელიც კრედიტით და დეპოზიტით სარგებლობასთან არის დაკავშირებული.

ცვლილებები 1 ივნისის შემდეგ დადებულ ხელშეკრულებებსა და 300–დან 50 ათას ლარამდე მოცულობის კრედიტებსა და დეპოზიტებს შეეხება. ბანკი ვალდებული იქნება, კლიენტს დეტალური ინფორმაცია მიაწოდოს არა მხოლოდ უშუალოდ კრედიტის პროცენტის, არამედ მომსახურებასთან დაკავშირებული ოპერაციების, გადარიცხვების, ნოტარიუსის, საჯარო რეესტრისა და სხვა ხარჯების შესახებ.

ამასთან, იარსებებს სტანდარტული ფორმა და ნებისმიერ კლიენტს საშუალება ექნება, საკუთარი ბანკის ხელშეკრულება ამ ფორმას შეადაროს.