სათამაშო ბიზნესის მოსაკრებლის განაკვეთები ორმაგდება

სათამაშო ბიზნესის მოსაკრებლის განაკვეთი იზრდება. შესაბამისი ცვლილებები სათამაშო ბიზნესის მოსაკრებლის შესახებ საქართველოს კანონში შედის, რომლის ინიცირება პარლამენტის ბიუროს დღეს გამართულ სხდომაზე მოხდა.
საკანონმდებლო ინიციატივა მთავრობას ეკუთვნის.
როგორც მთავრობის საპარლამენტო მდივანმა გიორგი ხუროშვილმა ჟურნალისტებს განუმარტა, აღნიშნული განაკვეთების გაზრდა მოსახლეობის სოციალურ მდგომარეობაზე არ აისახება.
მისივე თქმით, განაკვეთების დიფერენცირება სათამაშო ბიზნესის სახის მიხედვით ხდება.
დღეს მოქმედი კანონმდებლობით თითოეულ სათამაშო აპარატზე ყოველ კვარტალში 600-დან 1200, ხოლო ტოტალიზატორის, ბინგოს, ლოტოს თითოეულ სალაროზე ასევე ყოველ კვარტალურად  1500-დან 3000 ლარის  ჩათვლით გადასახადი არის დაწესებული.
კანონში შესატანი ცვლილებით ხსენებული მოსაკრებლების რაოდენობა გაორმაგდება.